ബെംഗളൂരു: വിവിധ കോർപ്പറേഷൻ ബോർഡുകളിലേക്ക് പുതിയ നിയമനങ്ങൾ നടത്താൻ ഹൈക്കമാൻഡിന്റെ അനുമതിക്കായി കാത്തിരിക്കുന്നതിനിടെ, കന്നഡ-സാംസ്കാരിക വകുപ്പിന്റെ കീഴിലുള്ള 14 അക്കാദമികളിലേക്കും മൂന്ന് അതോറിറ്റികളിലേക്കും പുതിയ ഭാരവാഹികളെ നിയമിക്കാൻ കർണാടക സർക്കാർ നടപടികൾ ആരംഭിച്ചു. പുതിയ ആളുകൾക്ക് അവസരം നൽകുന്നതിനായി, മൂന്ന് വർഷത്തെ കാലാവധി പൂർത്തിയാകുന്നതിന് മുൻപായി തന്നെ നിലവിലെ പ്രസിഡന്റുമാരോടും ഭാരവാഹികളോടും രാജിവെക്കാൻ സർക്കാരിൽ നിന്നും വാക്കാലുള്ള നിർദ്ദേശം നൽകിയിട്ടുണ്ട്.
കന്നഡ വികസന അതോറിറ്റി, കന്നഡ ബുക്ക് അതോറിറ്റി, കുവെമ്പു ഭാഷാ ഭാരതി അതോറിറ്റി എന്നിവയ്ക്ക് പുറമേ സാഹിത്യ അക്കാദമി, നാടക അക്കാദമി, സംഗീത നൃത്യ അക്കാദമി, ശിൽപകലാ അക്കാദമി, യക്ഷഗാന അക്കാദമി, തുളു, കൊടവ, കൊങ്കണി, ബിയാരി സാഹിത്യ അക്കാദമികൾ ഉൾപ്പെടെ 14 അക്കാദമികളുടെ ഭാരവാഹികളെ 2024 മാർച്ച് 16-നാണ് സംസ്ഥാന സർക്കാർ നിയമിച്ചത്. ബൈലോ പ്രകാരം മൂന്ന് വർഷമാണ് ഇവരുടെ കാലാവധിയെങ്കിലും ഒക്ടോബർ അവസാനത്തോടെ ഇവരുടെ സേവനം രണ്ട് വർഷവും എട്ട് മാസവും പിന്നിടുമ്പോൾ, നാല് മാസം ബാക്കി നിൽക്കെയാണ് സ്ഥാനം ഒഴിയാൻ ആവശ്യപ്പെട്ടിരിക്കുന്നത്.
ഒക്ടോബർ 23-ന് നടക്കുന്ന ലെജിസ്ലേറ്റീവ് കൗൺസിൽ തിരഞ്ഞെടുപ്പിന്റെ പെരുമാറ്റച്ചട്ടവും മൈസൂർ ദസറ ആഘോഷങ്ങളുടെ ഭാഗമായി അക്കാദമികൾ സംഘടിപ്പിക്കുന്ന വിവിധ സാംസ്കാരിക പരിപാടികളും മുൻനിർത്തിയാണ് നവംബറിൽ പുതിയ നിയമനങ്ങൾ നടത്താൻ തീരുമാനിച്ചിരിക്കുന്നത്. ദസറ ഉത്സവത്തിന് ശേഷം അക്കാദമി അധ്യക്ഷന്മാരുടെ രാജി സ്വീകരിച്ച് നവംബർ ആദ്യ വാരത്തോടെ പുതിയ പ്രസിഡന്റുമാരെ നിയമിക്കുമെന്നാണ് സൂചന. അതേസമയം, ഇതുവരെ രാജിവെക്കാൻ ഔദ്യോഗികമായി നിർദ്ദേശങ്ങളൊന്നും ലഭിച്ചിട്ടില്ലെന്ന് കർണാടക നാടക അക്കാദമി പ്രസിഡന്റ് കെ.വി. നാഗരാജമൂർത്തി വ്യക്തമാക്കി.
